班巴曾在英格蘭球壇打滾多年。(Getty Images)
土耳其球會Adanaspor周日(1日)宣布，曾效力過卡迪夫城、李斯特城等英格蘭球會嘅班巴因病去世，終年39歲。班巴4年前發現患上罕見疾病非何傑金氏淋巴瘤，據報因舊病復發與世長辭。
Adanaspor聲明表示：「我哋嘅技術總監班巴喺上場比賽前發病，並被送去醫院治療，好不幸佢喺呢場生命之戰落敗，我哋向佢屋企人同社區致以慰問。」
前科特迪瓦國腳班巴喺巴黎聖日耳門出身，踢過李斯特城、列斯聯、卡迪夫城同米杜士堡等球會，效力李城嗰陣曾跟領隊艾歷臣，艾歷臣上星期去世，班巴亦有喺社交網哀悼。
班巴喺2020年發現患上非何傑金氏淋巴瘤，經治療後一度以為已經康復，土耳其媒體指佢今次係舊病翻發，因而失去生命。